Azərbaycan Kinematoqrafçılar İttifaqı Milli Kino gününü təmtəraqlı qeyd edib
Bu gün Azərbaycan kinosunun yaranmasının 124 ili tamam olur.
Azərbaycanın siyasi və dövlət xadimi, ümummilli lider Heydər Əliyevin 2000-ci il 18 dekabr tarixli Sərəncamı ilə avqustun 2-si kino işçilərinin peşə bayramı – Azərbaycan Kinosu Günü kimi qeyd olunur.
Azərbaycan Kinematoqrafçılar İttifaqı 2 avqust – Milli Kino Gününü bayram əhval-ruhiyyəsində qeyd edib.
Tədbirdə Azərbaycan Kinematoqrafçılar İttifaqının sədri, Xalq artisti Rasim Balayev, Azərbaycan Yazıçılar Birliyinin sədri, AKİ-nin katibi, yazıçı Anar, katiblərdən – şair, ssenarist Baba Vəziroğlu, rejissor Əli İsa Cabbarov, Oleq Səfərəliyev, Mirbala Səlimli, İdarə Heyətinin üzvlərindən – Firəngiz Qurbanova, Ziya Şıxlinski, Nizami Abbas, Tahir Tahiroviç, eləcə də AKİ üzvlərindən olan dəvətlilər bayram əhval-ruhiyyəsində bir araya gəliblər.
Tədbirinin aparıcıları – Bakı Bələdiyyə Teatrının aparıcı aktyoru Tural Əhməd, aktrisası Zülfiyyə Məmmədova idi.
Z.Məmmədova ənənəyə sadiq qalaraq ilk sözü Azərbaycan Yazıçılar Birliyinin sədri, yazıçı Anar Rzayevə verib:
Anar müəllim öz çıxışına təəssüf hissilə qeyd edib ki, bu gün Azərbaycan kinosu televiziya ekranlarında yaşayır: “Köhnə filmlərimizə baxıb sevinirik, yaxşı ki, bu filmlərimiz olub. Amma inanıram ki, gələcəkdə kinomuz dirçələcək. Azərbaycan kinosu əvvəlki şöhrətini qaytaracaq. Bu bizim hamımızdan asılıdır”.
Kino günündə Azərbaycan Kinematoqrafçılar İttifaqının “Mən qadınam” qısametrajlı bədii film ssenari müsabiqəsinin qalibləri mükafatlandırılıblar.
Qeyd edək ki, müsabiqənin münsiflər heyətinin sədri Nadir Bədəlov və münsiflər heyətinin üzvləri Əli İsa Cabbarov, Vaqif Azəryar, Sevda Sultanova, Asif Rüstəmov müsabiqəyə qatılmış 100 ssenaridən 20 əsəri finala buraxıblar. Təqdim edilən ssenarilərin 60 faizi qadın müəllif olub.
Müsabiqədə 1-ci yer – “Dilbər”, ssenari müəllifi Orxan Məmmədli; 2-ci yer “Zənbil”, ssenari müəllifləri Mirmehdi Ağaoğlu, Mətləb Muxtarov; 3-cü yer “Neçəyədir?”, ssenari müəllifi Günel Şamilqızı qərar tutub.
Qaliblərdən yazar Mirmehdi Ağaoğlu qeyd edib ki, qadınlar daha çox basqıya məruz qalırlar: “Biz bunu gündəlik həyatımızda görürük. Hətta müəyyən ənənələrdən gəlmə xüsusiyyətləri hamımız daşıdığımız üçün özümüz də istər-istəməz o basqıları qadınlara tətbiq edirik”.
“Dilbər” ssenarisi ilə münsiflərin qəlbini fəth etmiş, birinci yerin sahibi Orxan Məmmədlinin ssenarisi mərsiyə sənəti ilə də bağlıdır. Onun qəhrəmanı ucqar kənddə yaşayan, diqqətdən kənarda qalan bir teatr aktrisasıdır.
Kino günü ilə bağlı keçirilən tədbirdə İttifaq ənənəvi olaraq mükafatlandırdığı kinematoqrafçıları da elan edib.
- İlkin Yusif (rejissor) – “Mən qəhrəman axtarıram” sənədli filminin uğurlu rejissor həllinə görə;
- Rəşid Ağamalıyev (animator) – Azərbaycan animasiyasının beynəlxalq əlaqələrinin inkişafında xidmətlərinə görə;
- İntiqam Hacılı (prodüser) – Müstəqil kinonun inkişafında və bölgələrdə kino mühitinin canlandırılmasında xidmətlərinə görə təltif olunub.
Azərbaycan Kinematoqrafçılar İttifaqının mükafatı hər il milli kinematoqrafiyanın inkişafında xidmətləri ilə fərqlənmiş yaradıcı şəxslərə ünvanlanır. Mükafatı təsis etməkdə məqsəd milli kinoda müsbət tendensiyaları diqqət mərkəzinə gətirməkdir.
Mərasimin bağlanışını Azərbaycan Kinematoqrafçılar İttifaqının sədri Rasim Balayev edib. O bildirib ki, Azərbaycan kinosu toparlanıb öz yolunu davam etdirəcək.
aki.az