Bişkek Beynəlxalq Film Festivalı ikinci dəfə 2024-cü il, 11-15 iyun tarixlərində Bişkekdə keçiriləcək.
Festival Qırğızıstan Respublikasının Mədəniyyət, İnformasiya, İdman və Gənclər Siyasəti Nazirliyi və Bişkek Meriyasının dəstəyi ilə təşkil olunur. Festivala 20-dən çox ölkədən 70-dən çox qonaq gələcək və 200-ə yaxın kinorejissorun iştirakı gözlənilir.
Film festivalının proqramına milli filmlərin retrospektiv nümayişi, həmçinin festivala gələn kinorejissorların və mədəniyyət xadimlərinin iştirakı ilə ustad dərsləri, mühazirələr və panel müzakirələri daxildir. Festival çərçivəsində ümumilikdə 30-a yaxın film nümayiş etdiriləcək.
Sözügedən festivalda kinotənqidçi Aygün Aslanlı Azərbaycan Kinematoqrafçılar İttifaqını təmsil edir.
Azərbaycan Kinematoqrafçılar İttifaqı milli kinomuzun dünya kinosuna, xüsusilə, türk dünyası kinosuna inteqrasiyasını və bu sahədə əməkdaşlığı vacib sayır və bu səbəbdən Azərbaycanın beynəlxalq kino tədbirlərində iştirakını dəstəkləyir. AKİ-nin təşəbbüsü ilə kinotənqidçi Aygün Aslanlı sözügedən festivala qatılıb.
aki.az