“Keçmişdən soraq, gələcəyə səsləniş” qısametrajlı filmlər müsabiqəsinə start verilib
Milli mənəvi dəyərlərimiz mövzusunda “Keçmişdən soraq, gələcəyə səsləniş” qısametrajlı filmlər müsabiqəsinə start verilib.
Müsabiqə Naxçıvan Muxtar Respublikasının Gənclər Fondu və Naxçıvan Dövlət Film Fondunun birgə təşkilatçılığı ilə həyata keçirilir.
Müsabiqəyə təqdim ediləcək qısametrajlı filmlərin mövzuları aşağıdakılardır:
- Xalq yaradıcılığı – əcdadlarımızın yaradıcılıq irsi
- Yüksək mənəvi – əxlaqi dəyərlər
- Vətənə, torpağa məhəbbət
- Milli təfəkkürün formalaşmasında milli adət-ənənələrin və mənəvi dəyərlərin rolu
Qeyd edək ki, müsabiqədə həm peşəkar, eyni zamanda həvəskar müəlliflər olmaqla 15-35 yaşlı Azərbaycan Respublikasının vətəndaşları, eyni zamanda ölkədə təhsil alan əcnəbi tələbələr iştirak edə bilərlər.
İştirak etmək istəyən müəlliflər Təşkilat Komitəsinə ərizə ilə müraciət edərək qısametrajlı filmi rəqəmsal daşıyıcıda təqdim etməlidirlər.
Yeri gəlmişkən, müsabiqəyə indiyədək heç yerdə yayımlanmayan filmlər buraxılır. Təqdim olunan filmlər 2021–2022-ci illərdə istehsal olunmalı və xronometrajı 20 dəqiqədən çox olmamalıdır.
17 fevral 2022-ci il tarixində elan olunan müsabiqəyə 25 may 2022-ci il tarixində yekun vurulacaq.
Müəlliflərin ərizə və hazırladıqları filmləri 20 may 2022-ci il tarixinədək Naxçıvan Dövlət Film Fondunda qəbul olunur (Ünvan: Naxçıvan şəh. Heydər Əliyev pr.1, Heydər Əliyev Sarayı).
Mükafatlandırma mərasimi 25 may 2022-ci il tarixində Naxçıvan şəhərindəki Gənclər Mərkəzində keçiriləcəkdir.
aki.az
.