“Olimpia” təqdim olundu

Dekabrın 20-də Azərbaycan Kinematoqrafçılar İttifaqının təşəbbüsü ilə rejissor Əli-Səttar Quliyevin “Olimpia” bədii filmi nümayiş olundu.

“Azərbaycan” CinemaPlusda baş tutam tədbirin moderatoru Azərbaycan Kinematoqrafçılar İttifaqının üzvü, kinoşünas Sevda Sultanova idi.

S.Sultanova film haqqında fikirlərini bölüşüb: “Filmə iki dəfə baxmışam, ikisində də darıxmamışam. Çox asan baxılan bir melodramdır”.

Rejissor Əli-Səttar Quliyev giriş sözündən öncə  tamaşaçılara təşəkkürünü bildirib: “Hörmətli kinosevərlər! Çox sağ olun ki, gəlmisiz. Azərbaycan Kinematoqrafçılar İttifaqına öz təşəkkürümüzü bildiririk ki, bizi yenidən bura yığıb. Film Mədəniyyət Nazirliyinin sifarişi ilə Mozalan studiyasında çəkilib. 2020-ci ilin yay aylarında çəkmişik. Yadınızdadırsa, bu çox çətin aylar idi, pandemiya vaxtı idi. Böyük bir əziyyət çəksək də, uğurlu nəticə əldə edə bildik.  Film tamaşaçılar tərəfindən böyük maraqla qarşılandı”.

Filmin ssenari müəllifi Rüstəm Babazadə öz qəhrəmanını belə xarakterizə etdi: “Əgər fikir verdinizsə, filmin qəhrəmanı evdə televizor olsa da, radioya qulaq asır, kran var, amma həyətdə yuyunur. Yəni, o, müəyyən mənada köhnə dövrdə, sovetlərdə qalan adamdı.

Filmin baş rol ifaçılarından biri Kəmalə İsrafilova obrazının çətinliklərindən danışdı: “Çətin və maraqlı məqam o idi ki, qəhrəmanım kubalı olduğu üçün mənə ingiliscə danışmağı yox, ingiliscə xüsusi bir aksentlə danışmağı, onu necəsə inteqrasiya etməyin lazım olduğunu,  orqanik alınmasını öyrədir. Bu baxımdan daha çox hazırlaşmalı oldum. Bir mətnin üzərindən dəfələrlə keçməli olursan və çalışırsan ki, o orqanik görünsün, təbii, mənim sözlərim kimi görünsün”.

Söhbət əsnasında moderator Sevda Sultanova komediya filmlərində olan yumor problemini qeyd etdi: “Bizim komediya filmlərimizdə çatışmayan cəhətlərdən biri, yəni qüsurlardan biri yumoristik səhnələrin gülüş doğurmamasıdır. Saxta, orqanik olmadan filmə əlavə edilir ki, tamaşaçı gülsün. Misal üçün sizin filmdə bəzi halları çıxmaqla, ümumilikdə siz bundan qaçmağa çalışmısınız, yumorlar yerində verilir. Bax bunun üçün, yəni, belə bir keyfiyyətli yumor yaratmaq üçün onu dramaturgiya ilə orqanikləşdirməyə nə lazımdır? Nə etmək lazımdır ki bizim komediya filmlərimizdə belə bir keyfiyyətli yumor olsun”?

Rejissor suala aydınlıq gətirərək bildirib ki, tamaşaçıların zövqlü yumoru anlaması üçün daha çox maarriflənmə lazımdır: “Yəqin ki, hansısa bir klassik zarafatları başa düşmək üçün biraz ondan məlumatlı olmaq lazımdır”.

– Misal üçün, bu filmdə elə olubmu ki, montaj prosesi vaxtı hansısa belə bir səhnə görmüsüz və onu yüksək tələbə cavab vermədiyinə görə kəsmisiz?
– O qədər… Mənim filmim bir saat iyirmi neçə dəqiqə idi, amma sonda bir saat səkkiz dəqiqə saxladım.
– Ssenari müəllifi ilə heç konflikt olmayıb?
– O qədər konfliktlər olub montaj prosesində. Elə rejissorlar var ki, öz materialına qənaət edir, yəni kəsmir. Mənim belə problemim yoxdur.
Tamaşaçılardan biri sualının olmadığını, ancaq bütün heyəti təbrik etdiyini bildirdi: “İstər qocaman sənətkarlarımızı, istərsə də yeni simalarımızı. Hamını təbrik edirəm və düşünürəm bu filmin televiziyada da izlənməsi yaxşı olar və sizə yeni sifarişlər gələr”.

Daha ssonra S.Sultanova sualını aktyor Rasim Cəfərə ünvanlayıb: “Siz tələbat olan aktyorlardan birisiz. Bu birmənalı belədir. Bəs sizin hansı çətinliyiniz olur rol üzərində işləyəndə? Məsələn, hiss edirsiniz ki, bu o biri rola bənzəyir, nəyisə təkrarlayır. Bunlardan qaçmaq üçün nə edirsiniz”?

Rasim Cəfər qeyd edib ki, filmlərə ilk çəkilən vaxtlarda belə böyük bir problemi yaranıb: “Demək olar ki, üç filmə dalbadal çəkildim. Hamısı eyni tip xarakterlər idi. Əvvəl  “Ev” filminə, sonra İlqar Nəcəfin “Teatral həyat”  və Cavid Təvəkkülün “Əzizim Fellini” filminə. Aşağı yuxarı personaj olaraq bir-birilərinə bənzəyirdilər. Sonra mən şüurlu surətdə bu tip təkliflərdən qaçdım. Daha o cür təklifləri qəbul etmirdim. Demək olar ki, susan, kədərli dayanan, nə ssenari var həmən göndərirlər mənə. Fərqli nələrsə istəyirəm. Amma yaş da öz sözünü deyir. Sən artıq, eyni olsa belə, orada nə isə fərqli şeylər tapmağa çalışırsan. İndi alınır, alınmır o başqa. İlk baxışdan eyni görünsə belə fərqli nələrsə tapmağa çalışıram ki, bir-birinə bənzəməsin”.

Tamaşaçılar müzakirələrdə aktyor heyətinin kamilliyini, yumorun zövqlülüyünü, musiqi həllinin uğurunu qeyd etdilər.

Filmin ssenari müəllifi Rüstəm Babazadə, quruluşçu rejissoru Əli-Səttar Quliyev, operatoru Nadir Mehdiyevdi. Rolları Rasim Cəfər, Kəmalə İsrafilova, Qurban İsmayılov və başqaları ifa ediblər.
Film müzakirələrlə davam edib.

aki.az