V Animafilm Beynəlxalq Animasiya Festivalının bağlanış mərasimi keçirilib

V Animafilm Beynəlxalq Animasiya Festivalının bağlanış mərasimi keçirilib. Nizami Kino Mərkəzində keçirilən mərasimdə qaliblər mükafatlandırılıb.

Qeyd edək ki, sentyabrın 7-dən 11-dək davam edən, iqlim dəyişikliyinə həsr olunan festivalın devizi “Bir bilet – bir ağac” adlanıb. Bu il keçirilən festival tamaşaçılara müsabiqə, müsabiqədənkənar və peşəkarlar olmaqla üç əsas proqram təqdim edib. Festivala 50 ölkədən 230 film daxil olub. Seçim komissiyası tərəfindən müsabiqəyə 29 ölkədən 75 film qəbul edilib. İştirakçılar bir yerli və altı beynəlxalq kateqoriya üzrə mükafatlar uğrunda yarışıblar. Ölkəmizdən 16 film müsabiqədə iştirak edib. Bütün seçilmiş filmləri beynəlxalq və uşaq münsiflər heyəti izləyib. Uşaq münsiflər heyətinə 22 yerli uşaq, beynəlxalq heyətə isə 6 peşəkar xarici münsif daxil edilib. Festival çərçivəsində Nizami Kino Mərkəzində beynəlxalq münsiflər heyəti ilə görüşlər, rejissor Conatan Laskarın (İsveçrə) ustad dərsi, bundan əlavə Nitya Ramloqan (ABŞ), Tilli Vallace (İngiltərə), eləcə də Nəzrin Ağamalıyevanın (Azərbaycan) iştirakı ilə “Stop motion” və “Şüşə üzərində animasiya” vorkşopları da təşkil olunub.

Xatırladaq ki, festivalın tərəfdaşları Mədəniyyət Nazirliyi, Azərbaycan Kinematoqrafçılar İttifaqı, Qarabağ Dirçəliş Fondu, “Culture Network House Assosiation”, Azərbaycan Yaradıcı Sənayelər Federasiyası, Nizami Kino Mərkəzi, “Annecy” Beynəlxalq Animasiya Film Festivalı və digər qurumlardır.

2023-cü ildə keçiriləcək VI festivalın mövzusu “Gender bərabərliyi”nə həsr olunacaq.

aki.az