2024-cü il 2-6 oktyabr tarixlərində VII ANİMAFİLM Beynəlxalq Animasiya Festivalı keçiriləcək.
Azərbaycan Animasiya Assosiasiyasının və “PERİ FİLM” MMC-nın təşkilatçılığı ilə, Azərbaycan Respublikası Mədəniyyət Nazirliyi və Azərbaycan Respublikası Kino Agentliyinin təşkilati dəstəyi ilə Baku Cinema Breeze (BCB) festivalı çərçivəsində baş tutacaq festivalın builki mövzusu “SEVGİ”dir.
ANİMAFİLM-dən bildirilir ki, animasiya, duyğuları vizual ifadə etməyə imkan verdiyindən, sevgi məfhumunu əhatəli çatdırmaq üçün mükəmməl bir vasitədir: “Bizim niyyətimiz, sevgini ön plana çıxararaq izləyicilərimiz arasında empatiya, anlayış və birlik hissini gücləndirməkdir”.
Qeyd edək ki, bu il festivala 2 beynəlxalq və 2 yerli kateqoriya üzrə 37 ölkədən 196 film daxil olub. Seçim komissiyası bütün filmləri dəyərləndirərək, müsabiqə şərtlərinə uyğun gələn 18 ölkədən 48 filmin müsabiqədə iştirak etməsini məqbul sayıb. Onlardan 12 film yerli, 36 film isə beynəlxalq kateqoriyalarda yarışacaq. Müsabiqədə iştirak etməsi üçün seçilmiş filmlər beynəlxalq münsiflər heyəti və tamaşaçılar tərəfindən qiymətləndiriləcək, qaliblər VII ANİMAFİLM festivalının bağlanış mərasimində elan olunacaq.
Xatırladaq ki, 2018-ci ildə yaradılmış ANİMAFİLM Beynəlxalq Animasiya Festivalı Azərbaycanın ilk beynəlxalq animasiya festivalıdır.
Azərbaycan Kinematoqrafçılar İttifaqı festival yarandığı gündən əsas tərəfdaşı olaraq öz maliyyə dəstəyini əsirgəməyib.
Hər il payızda keçirilən festivalda yüzlərlə yerli və xarici animasiya filmləri nümayiş etdirilir, işgüzar görüşlər, sərgilər, uşaqlar və peşəkarlar üçün ustad dərsləri təşkil olunur. Festivalın təşkil edilməsində məqsəd? yerli və xarici tamaşaçıları, peşəkarları sevindirmək, həmçinin Azərbaycanda animasiya sənətinin inkişafına təkan verməkdir.
aki.az