Kinomuzun Ulduzu, Mayası dünyasını dəyişdi

Aktrisa və pianoçu Tamilla Rüstəmova uzun sürən xəstəlikdən sonra dünyasını dəyişib.

Azərbaycanın görkəmli bəstəkarı Səid Rüstəmovun ailəsində 1936-cı ildə dünyaya göz açan T.Rüstəmova, 1959-cu ildə Qnesinalar adına Musiqi institutunun “fortepiano” ixtisası üzrə bitirib.

1962-ci ildə rejissor Həbib İsmayılovun quruluşunda ekranlaşdırılan “Böyüq dayaq” filmində Maya roluna çəkilən və ilk filmi ilə də tamaşaçılıar tərəfindən sevilən, ifası yüksək qiymətləndirilən Tamilla, iki il sonra yenidən filmə dəvət alır.

1964-cü ildə  Ağarza Quliyevin çəkdiyi “Ulduz” filmində, qəhrəmanın adını daşıyan obrazı-Ulduz obrazını oynayır. Hər iki filmdəki obrazlar müəyyən mənada bir-birinə bənzəsə də, aktrisa dəyişik xarakterləri üzə çıxarmağı bacarılb ki, bunda da filmin rejissorları böyük rol oynayıb. Eyni ildə Azərbaycan kinosunda ilk dəfə olaraq 3 novelladan ibarət kinoalmanax hazırlanır: “Dağ meşəsindən keçərkən…”, “Zirvə”, və “Cazibə qüvvəsi”. Aktrisa “Zirvə” novellasında Sevda roluna çəkilir.

1971-ci ildə isə “Axırıncı aşırım” filmində Növrəstə adlı epizodik rola dəvət alır. Son iki filmdəki rollar o qədər diqqəti çəkməsə də, Tamilla Rüstəmova bir aktrisa kimi öz sözünü Maya və Ulduz obrazlarında deməyi bacarır. Sonralar aktrisa ixtisas aldığı musiqi sahəsi üzrə fəlaiyyətini davam etdirir və vokalçı Olgerd Krastınşa ilə ailə quraraq Riqa şəhərində həyatına davam edib.

Ömrün 86-cı ilində vəfat edən Tamilla Rüstəmovanın əziz xatirəsi sadəcə fimlərdə deyil, tamaşaçı qəlbində də daima yaşayacaq.

Azərbaycan Kinematoqrafçılar İttifaqı Tamilla xanımın vəfatından kədərləndiklərini bildirir və mərhumun ailəsinə dərin hüznlə başsağlığı verir.

Allah rəhmət eləsin!

 

 

 

 

aki.az