VIII “Visla” Polşa film festivalının ikinci filmi nümayiş olundu

Polşa Film Festivalı davam edir. Festival Azərbaycan Kinematoqrafçılar İttifaqının “Visla” Polşa film festivalı ilə əməkdaşlığı çərçivəsində baş tutur.

Oktyabrın 11-də təqdim olunan ikinci film Yerji Skolimovskinin “İA” filmi olub.

Nümayişdən öncə festivalın koordinatoru və layihə meneceri Yanna Neka filmin rejissoru və film haqqında qısa məlumat verib.

O bildirib ki, “İA” filmi Kann film festivalında münsiflər heyətinin xüsusi mükafatını qazanıb. “Ən yaxşı xarici film” nominasiyasına namizəd də olub.

“İA” filmi dünyanı bir heyvanın gözlərilə tamaşaçıya izlədir. Melanxolik gözləri olan boz ulaq İA həyat yolunda yaxşı və pis insanlarla qarşılaşır, xoşbəxtliyi və əzabı yaşayır.

Rejissor filmdə insanların heyvanlara göstərdiyi laqeyd münasibətdən danışır. İA onun sirkdəki idarəçisi Kasandranın sevgisini və məhəbbətini arzulamağa davam etsə də, insanlar onu yalnız bir heyvan kimi görürlər.

Nümayişdən sonra Azərbaycan Kinematoqrafçılar İttifaqının əməkdaşı, rejissor, kinoyazar.az saytının redaktoru İlqar Quliyevin moderatorluğu ilə filmin müzakirəsi baş tutub. Tamaşaçılar filmlə bağlı fikirlərini bölüşüblər.

“Azərbaycan” CinemaPlus-da ümumilikdə 6 polyak filminin göstərilməsi nəzərdə tutulub.

Növbəti filmlər 12, 17, 24, 31 oktyabr tarixlərində nümayiş olunacaq.

aki.az