Oktyabrın 24-də 76 saylı tam orta məktəbdə Azərbaycan Kinematoqrafçılar İttifaqının sədri, Xalq artisti Rasim Balayevlə görüş keçirilib.
Görüş, orta məktəbin illik Fəaliyyət Planınına uyğun olaraq, məktəblilərin mütaliə vərdişlərinin təkmilləşdirilməsi və onlarda mütaliə mədəniyyətinin formalaşdırılması və “İmzalı görüş” layihəsi çərçivəsində şagirdlərin yazıçılar, bədii qiraət ustaları ilə görüş məqsədilə təşkil olunub.
Tədbirin əvvəlində dahi şair Nəsimi haqqında ətraflı məlumat verən məktəbin Azərbaycan dili və ədəbiyyatı müəllimi Qəndab Quliyeva, “Nəsimi” filminin ərsəyə gəlməsindən söhbət açıb. Q.Quliyeva Rasim Balayevin keçdiyi həyat yolu, rol aldığı filmlərin tarixçəsindən bəhs edib.
Tədbirin maraqlı hissələrindən biri də Xalq artistinin yaratdığı obrazlarla qarşılaşması olub. Belə ki, tədbirboyu orta məktəbin şagirdləri tərəfindən hazırlanmış, görkəmli aktyorun rol aldığı “Nəsimi” filmindən səhnəciklər canlandırılıb.
Tədbirdə məktəbin direktoru Şəfəq İbişova və şəhid ailələri iştirak ediblər. Sonda çıxış edən məktəb direktoru Şəfəq İbişova şagirdlərdə mütaliəyə marağın artırılmasında bu cür tədbirlərin böyük rolu olduğunu vurğulayıb və bu tədbirdə iştirak dəvətini qəbul edən qonaqlara və şəhid ailələrinə təşəkkür edib.
Xalq artisti tədbirdə ona ünvanlanmış sualları ətraflı cavablandırıb və 76 saylı məktəbin kollektivinə belə bir tədbir təşkil etdiklərinə görə öz minnətdarlığını bildirib. Sonda xatirə şəkilləri çəkilib.
aki.az